Ráðgevingin fyri føroyingar í Danmark


Lesandi og lærlingar, ið lesa uttanlanda kunnu søkja um at varðveita fulla skattskyldu í Føroyum.

Treytir:

  • tú skalt áðrenn lestur ella læru uttanlanda hava havt fastan bústað í Føroyum í minst 4 ár
  • tú skalt verða uttanlanda í lestrar- ella útbúgvingarørindum
  • tú skalt lata TAKS upplýsingar um útbúgvingina, útbúgvingarstað og ásettu lestrartíð
  • tú skalt altíð kunna vátta, at tú framhaldandi ert undir útbúgving
  • tú skalt upplýsa TAKS um broytingar í útbúgvingini, t.d. um tú gevst ella skiftir útbúgving

Reglurnar eru at finna í Kunngerð nr. 109 frá 5. juli 2001 um lesandi og lærlingar uttanlands.

Fyrimunurin av at varðveita fullu skattskylduna í Føroyum er, at tú skalt gjalda minni í skatti, um tú arbeiðir í Føroyum t.d. í summarfrítíðini. Tú fært ein botnfrádrátt uppá 30.000 kr., tað vil siga, at fyrstu 30.000 kr. tú forvinnur, eru skattafríar.

Um tú ikki varðveitir fulla skattskyldu og arbeiðir í Føroyum, verður tú avmarkað skattskyldug/-ur og skal gjalda 42 prosent í skatti av bruttoinntøkuni, umframt onnur gjøld, sum Taks afturheldur – lesa meira um hesi gjøld her: https://www.taks.fo/fo/borgari/skattur/at-vardveita-fulla-skattskyldu-i-foeroyum

Sjálvt um tú varðveitir fulla skattskyldu í Føroyum, ert tú eisini fult skattaskyldug/ur í Danmark.

Inntøka úr Føroyum skal uppgevast til skattamyndugleikarnar í Danmark, samstundis sum sjálvuppgávan verður latin inn. Forvunna upphæddin, goldin skattur í Føroyum og evt. frádráttir skulu upplýsast undir teigarnir fyri ‘Udenlandsk indkomst’.

Um tú býrt í Danmark og hevur varðveitt fulla skattskyldu í Føroyum, skalt tú á føroysku sjálvuppgávuni bert upplýsa um inntøkur í Føroyum.